2014 жылғы 18 қарашада ҚР ҚМ МКК Төрағасы Дәулет Ерғожиннің  «KGH Border Service» швед компаниясының президенті Ларс Карлссонмен жұмыс кездесуі өтті.

Ларс Карлссон – «Gothia» сыйлығының иегері, әлемге танымал «Stairway» Тұжырымдамасының авторы.  «Gothia» сыйлығы Швецияда мемлекеттік басқару саласында сапа мен инновация жөніндегі ең үздік жобаларға беріледі. 

«KGH Border Service» компаниясының президенті ретінде қызметін бастағанға дейін, Ларс Карлссон Швецияның кеден қызметін басқарған, алты жыл бойы Дүниежүзілік кеден ұйымының Институционалдық даму департаментіне жетекшілік еткен.

Кездесу барысында Ларс Карлссон өз компаниясының тұсаукесерін өткізіп, кеден және салық қызметін дамытуға қолдау көрсететін жобалар жөнінде ақпарат беріп, тәуекелдерді басқарудың тиімді жүйесін және уәкілетті экономикалық операторлар институтын дамытуды Қазақстан Республикасында құру үрдісінде кеңес беру жағынан қолғабыс көрсетуге әзір екендігін білдірді.

Кездесу соңында Дәулет  Ерғожин «KGH Border Service» компаниясымен тығыз ынтымақтастықты одан әрі жалғастыруға мүдделі екендігін білдірді және  Ларс Карлссонға кірістердің тиімді қызметін Қазақстан Республикасында құру бойынша қадам сайынғы жасалатын ұсыныстарын беруді өтінді.

ҚР ҚМ МКК БАСПАСӨЗ ҚЫЗМЕТІ